FƏRZƏNDON

İjənən Tolışi səpe Giləvo ne, Xəzri omedə. De bəboli bo tolışi, boəyro hiç vaxti Giləvo nıqini, hejo de xəzri bə cange. Qa çı milləti dasto çəy nomi səydən, qa çəy zəmini nomi səydən, qa çı milləti yol-yolə merdon bəştə nom dəvonedən, qa çəy toponimon dəqiş kardedən, bımon həmməy petove bəbe, ısət boy hınəmandiş bəştə tolış bıvot. Hukumət i tono, pantırkiston çə tono hur kardedən ıştı səpe. Im çı viyəvonətiye? Xıdo bə hiç milləti jıqonə jimon ğısmət nıkə. Im milləti alimən deştə hırdənon co zıvonədə sıxan kardedə, bənnoən. Jıqo bızın kisə ğəstonədə “deştə hırdənon tolışi sıxan məkən” təbliğati bardedə. Qavar tarsedən? Hırdənon validon tarsedən ki, çəvon hırdənon yol bəben, boştə xəlği fərzənd bəben? Qavar çı hırdənon validon pidəşonni çəvon əğlon boştə milləti fərzənd bıbun? Be bəzne fik kardedən ki, əvon hejo “nümunəvi vətəndaş” bıbun, vəse? Əqəm əmə ımruj “vətəndaş”i fərği çı “fərzənd”i fərğiku co karde zınedənimonsə, co vırədə bo qıno nəve lozim ni, qıno çəmə ıştənədəy. Çı milləti yol-yolə fərzəndon bən, hestin, çimiku jəqoən bəben. Iştəni fər zınə har xonəxo boştə milləti fərzənd bəbe. Çənnəən bə Novruzəli muəllimi səpe bışunən, əv ıştə tolışətiku i qəm, i po bə dumo onıkıryəy. Şəhidəti ğəbulış kay, əmo ıştə milləti fərzəndətiku benışe, çumçiko çəy əğidə pokbe. Peşo Hilal Məmmədovi de şərə maddə dənoşone bə dılə, tolışə xəlğ kam mandəbe ıştə ın fərzəndiyən ginkə, milləti fərzəndon əştin səpo, hukumət məcbur be okıryəy bə dumo. Hilal muəllim çı ziondono benışəy Rafiq Cəlilovi bə zindon ğande piyəşone, ijən bıjyon tolışə xəlği partorə fərzəndon, aləmşon jəy bə iyəndı. Hukumət bı səfəən okıryəy bə dumo. Peşo çı “Tolışon Sədo” rujnomə kollektiv bə hədəf peqətə be, iminci Azər Kazımzadə, 3 manq çətonən Vüqar Mustafayev de İradə Məlikova qətemon bə məydon beşe. İjənən tolışə xəlği partorə fərzəndon əyştin səpo, ım qulqulən jıqo dəvarde. Sıxanım çiçe? Ehanə əmə boştə xəlği fərzənd ne, befərəzənd bəbemonsə - bo Tolışi rujqari ısətnico bəme lozime. Ey Tolış, deştə hırdənİ tolışi sıxankə, əv iqlə ıştı hırdən ni, əv çı Tolışi hırdəne, boştə xəlği fərzənd nıbə əğıl boştə validonən fərzənd be əzıni.

Ruslan Almaszadə