lki İcra sərdar Revşən Bağırovi dızdə əməlon
--------------------------
Dəvardə bərnomədə Liki icra hakimiyyəti sərdar Revşən Bağırovi ıştənbəsətiyon həxədə məlumat doəmonbe, məlumati oxoyədə sıxan domone ki, nezə bərnomədə çey kali nadurustə əməlon bəşmə nəzə bərosnemon. Bı bərnomədə Rövşən Bağırovi Liki tarixiə avjoron, abidon çı cur dızdiye, iyən həvate barədə qəp bəjemon.
2017-minə sori iyunə manqədə Liki Orand di ğəvıstoni əraziku qıləy yolə ğoçə abidə qin be həxədə sayton qeş-qeşi məlumat doşone, əmmo həmonə ğoçə abidə pəydo nıbe. Likijon əminin ki, ə abidə de Revşən Bağırovi dasti dızdiyə bə, çumçiko Liki polison bo həmonə abidə pəydo kardero səy nişon nıdoşone. Eksperton bı qənaətədən ki, “siyo” vıjorədə jəqo abidə ğıymət 50 həzo dollarisə bəpeye.
Həmonə sori Azərbaycani Arxeoloqiya İnstituti arxeoloqon Likədə arxeoloji kandə koon bardışone, bı kandəyonədə əvon qıləy ğədimiyə xəzinə pəydo kardedən, həmonə xəzinədə xəyli ğızılə məmulaton bedən, bı xəzinə barədə Azərbaycani devlətə televiziya qeş-qeşi qıləy reportajan doydə və maşki həmonə ğızılon qin bedən, ijən Liki polison bo həminə arxeoloji avjoron pəydo bero hiç cımən doydənin. Imən əy subut kardedə ki, ya həmonə avjoron Boku mərkəzi hukuməti peqətəşe ki, peşo əvoni , məsələn, Naxçıvanədə pəydo bıkon, ımonən həminə avjoron bə Tolışi mədəniyyəti ne, bə tırki mədəniyyəti aid be bıvoton, yaanki həmonə arxeoloji artefakton Rövşən Bağırovi de Liki polisi bə ico dızdyəşe.
Bağırovi dızdiə əməlon demi sə bedəni. Likədə bə çey nav beşə zoə nıbe səbəbiku əv tikəyən ğodur bedə, 2018-minə sori avqustə manqi sıftədə əmr doydə ki, Liko şəş qılə ğoçə abidə bıbon bə Şamaxi. Çə şəş ğoçə abidə qıləy Lamay di ğəvıstono dızdiəşonbe. Lamayıjon bo həmonə abidə pəydo beyro xəyli dast-poçə jəydən, ko pandomedə, hətto Rusiya Elmon Akademiya ım ko peqətedə bəştə nəzarət. Rövşən Bağırov çə şəş qılə ğuçə abidədə qıləy bə Lamay oqırdıne məcburiyətədə mandedə, əmmo çə penc qılə ğoçə abidə çune şeyku hiç kəsi tosə ısət xəbəş ni. Likijon votəy nıbu: ə penc qılə ğuç şe Rövşən Bağırovi dədə xəyədə.
Qiramiə əməson, əmə bı bərnomədə Revşən Bağırovi dızdə əməlon 3 qıləku sıxan kardımone. Ehanə şıməkuən jıqonə fakton hestebu, bı barədə bəçəmə email adresi nıvışte bəzıneşon.

2. Liki İcra hokuməti sərdar çoko de puli hırişone
-------------------------------------
Əmə 2 qılə bərnoməy ki, Liki həxədə qəp jedəmon. Tolışon votəynə -“igidi nom bəpe se kərə qətə bıbo”,- əmənən bı ğaydə əməl kardedəmon və Liki icra sərdar Revşən Bağırovi həxədə seminə bəjəm qəp bəjemon. Bı səfə çəy Likədə bardə ıştənbəsətiyon, ğodurğanətiyon həxədə ne, cinayətə hərəkəton de puli zu çoknə niyo karde həxədə qəp bəjemon.
Bı beğanunə koonədə Liki polisi rəis Huseynəli Məlikovən de Revşən Bağırovi xanboze. Bağırov ım beğanunə əməlon de Huseynəli Məlikovi dasti bə riyə nodə, yəni ım dı kəs Liki kriminalə əməlon çı kriminalo bekardero yolə rışvə sedən. Əmo həminə rışvə dıkəsinə hardedənin, çə rışvədə bə Liki prokurori, iyən Devlətə Əmniyyətə Xidməti Liki şöbə rəisiyən rəsedə.
Jıqo qıləy cəncələ hadisə iyuliə manqi 15-də bə Azərbaycani internet resurson beşe. Həminə məlumatədə votə bedəbe ki, “Azərişıq” Ojə Səhmdarə Cəmiyyəti Lankon reqional şebə sədri muavin Aydın Məmmədovi bıyəzo, (əv həmən çı Aydın Məmmədovi şəxsi sıvore, (şofere), martə manqədə de 13 sinnınə kinə de zori tətbiq karde roy cinsi əloğədə bıə və ımoni həmmə bə video kəşəşe. Əv həminə video bəştə duston iyən bə həmron nuşo doə bəpeşt bə kinə nuşo doəşe və bəy tars omə ki, ım video bəno bə internet. Həminə kinə beabru beku tarse səbəbiku bə həminə zoə votəyon rozi bə. Martə manqiku mutamədi həminə zoə de həminə 13 sinnınə kinə cinsi əloğədə bə. İyulə manqi 15-də məlum bə ki, kinə 4 manqe ki, hamiləy. Kinə pə sıftə bə polisi şikat kardəşe. Peşo Aydın Məmmədovi kinə pə rozi kardəşe, eyən ıştə ərizə bə dumo peqətəşe. Im məsələ bə ictimaiyə muzakirə beşə bəpeşt kinə pə iyuli 19-ədə çı Liko beşə. Aydın Məmmədov boəvonro Bokuədə kə bə kirə qətəşe ki, ım məsələ de aşişəti bə riə bıno
. Aydın Məmmədov Revşən Bağırovi kabinetədə bı məsələ həsr bə iclasədəən ıştirok kardəşe. Həmonə iclasədə sıvoy Aydın Məmmədovi Liki prokuror, polisi rəis iyən DTX Liki rayon şebə sədr iştirok kardəşone. Məmmədovi bəvon yolə rışvə doəşe ki, əvon ım məsələ bə reç bınən. Peş həminə iclasi Aydın Məmmədovi bə Liki siprişon votəşe ki, çımı bıyəzo əcəb kardəşe, pulmon heste, çiç bıpyomone, eyən bəkardemon.


Bı jıqo beəxlaqəti tov nıvardə Liki camaat 2 kərə bə Aydın Məmmədovi kə hucum kəşəşene, əmo Liki polison həminə hucumi navşon qətə. Im məsələ bə qıley hədd rəsə ki, polisonən bə Liki polisi rəisi ıştə etirazşon rosniyə, qınokari bə zindon dənoe tələb kardəşone.
Rayoni polisi rəis Huseynəli Məlikov, həm de Revşən Bağırovi aspardəy, həmən Aydın Məmmədovi doə yolə rışvə müğabilədə bə cinayətə koy xitam dodə. Imən bəy səbəb bedə ki, kali polison bı nomerdəti tov vardedənin və bə rəisi sənibəton ıştə norozyəti rosnedən. Rəisi bımi pape nıbe, iyuli 20-də çəy muavini de rəisi bə ğoymə tasıb beşe səbəb bedə.
Əmo oxoyədə Aydın Məmmədovi doə rışvə ğalib omedə, həminə cinayətə ko dəbastə bedə.
Çə kinə peşonə tale həxədə məlumatmon ni, əmmo kinə pə bə internet resurson doə musahibədə votəşbe ki, çı kinə sinn bə kəbin nırəse səbəb, çəy 18 sor təmom beədə de Aydın Məmmədovi həmonə bıyəzoə kəxıvand bəben. Ehanə jəqo bıbo, əmənən mubarək bəvotemon.Əmo əmə çə kinə taleku norohətimon.
İqlə Aydın Məmmədoviku norohət nimon, çumçiko ey de rışvə zu həm kinə pə qəvi bastışe, həmən Liki icra sərdar, iyən polisi rəis hıryəşe. Demiən jıqo benamusə, cinayətə fakti səpe eparçınişe. Im hadisə bə səbəb i kərəən bə yod vardımone ki, bıdə çəmə radioəməsonən bızınon ki, Azərbaycanədə har çi, hətto icra hakimiyyəti sərdari ıştəniyən de puli hırye bedə.