Vo

( Sırəynə hekoye)

Hələ 13-14 sinım hıstbe, dıştə bibzoə, dı Mələ ( Mərhəməti) vey hənək əkeymon, tojə-tojə məktəbədə, di qolibədə sırəynə səhnəcikon nuşo ədeymon.Çəmə ko, vıte-sırebe. Ruji məsıme Mələ lınq arşiə, bardəşone bə rəyon nəxoşxonə. Rə şim çı bibimon key, bibi qəpış jeki, çəmə dı Mordobə məhləku davardə də, əyo dı ləpeti maftul okırniədə, maftul çı ləpetiku rəxə, omə qınyə bə Mələ lınqi, çey qıle lınq arşiə. Bibi vıtışe, ısə çey lınqışon bə qıpsışon qəte ,bə se-ço ruj bome bəkə.

Se-ço ruj bəpeştə Mələ ome bəkə, əlbəsat şim çey tono. Bımono mərağinbe, dərs vaxti Mələ əyo çiç kardəbe. Dı Mələ vindemo karde bəçəton parsim karde :

-Zə, dərs vaxti ıştı əyo çı ozzo hısdebe?

Mələ qəpış je:

-Zındəş, oxonə vaxton Xanəli dayzoə eqinəbe bəsə mı, unən bəsə Nəsirəğə, zə, ha ruj əmını dərsdə rost əkey, tarixədə fılonkəs ki bə, flon ko keynə bə, flonkəs keynə çı moədə bə , xəbə əstəni. Zə, az çı bıznım keynəbə , çımı çı tarixi hande zəhləm şedə, zındənıbim. Xanəli dayzoən ha ruj bəçəmə qiərəği qıle silli dəçkoni, dıleyən 2 ənvışdi. Həmonə ruji məktəbi roysə bə Nəsirəğəm vıte ," ımruj unən tarix dərsımon hıste, Xanəli məllim unən əməni rost bakay, boy ımruj məşəmon bə dərs, bışəmon bə çayahi, bınəvəmon, qıle qaib bənıvışde, ha bıdə bınvışdi." Nəsirəğa əlbəsat rozibe, roədə, suə kranti vədə qardimon bə Mordobə tərəf .Ha əyo bəçımı sə ım ko ome. Kaş çı Xanəli dayzoə i qılə ney, lap penc qılə sillim hardəbe, əmmo ım qəzo bəçımı sə omənəbe.

Sırim-sırim, vıtıme:

-Haa, mavji həni ıştı vo beşə, ağıl omə bə sə..

Vindıme Mələ bərkədə sıre. Sıre, sıre..Pişe çıçsə qəp bıjəni, qəpış je nızne unən sıre..Vıtıme:

-Za, çiçbe bətı, az hələ zərfətım bıno kardəmni, qavar bətı nəxoşxonədə morfişon vey jə, çey təsir hələ şəni.

Mələ unən bərkədə sıre, ım səfə çeyku qıle vo beşe. Həni ıştənim oqəte nızne, azən bərkədə sırim.

Mələ vıtışe:

-Zə, hıjo əyo, nəxoşxonədə jıqo be.

Xəbəm se:

- Mələ, nəxoşxonəda çiçbe, çiç vinde?

Mələ ıştə çəşon astış molışe, qəpış je:

-Nəxişxonədə ,palatədə oləxtəbim, çimı ım arşiə lınqı bə həvo eyaştəşbone.Seminə ruji İzi mamu çımı tono ome.Tı zındəşəni əv vey ləğ-ləğə kardəkəse. Bino kardışe mıni bo sırvonie, anədə sırəynə qəponış je, je oxoy az tovım harde nızne, çımındə qıle bərkə vo beşe.İzi mamu ım sədo məsəcəğın eşte səpo, vıtışe:

-Haa, çımınki, tobə ım vırə be, ıştı vom bekarde, ısə rohət şe bəznim. Həni tı rə çok bəbış.

Azən umjən bim bə Mələ xeyli sırimon ,əncəx sıre-sıre ımım vıte zıne:

-Mələ, vo beşe çoke, əmmo bey verdış məkə.