Yönetici · 3 dk.
MERDƏ TƏRBİYƏ
Lələku səmone merdə tərbiyə,
Merd kardəşe əmə dədə tərbiyə.
Nocins-həromonku bəmon diyəro,
Dumnə şəytononku şəmon diyəro.
Həlolə ğəzənci bə dast buəmon,
Jimonədə zəhmət bıkəş bıəmon.
De kuli bə vişə şəm bo ezımi,
Tukədə bə marzi jəme kızımi.
Bə ico: lələ, az, dodo de hovə,
Bə şim dəvoştəme marzisə bofə.
Hələ perosnəme şartukə donə...
Şartukə huşədə soxtəme şonə...
De dodom dinqədə şartuk, bırz kuə,
Kədə şin nomone bırzədə kuə.
Kumədə hestebe zandəqo, qumuş,
Maştəən, şanqoən pur əbi qoduş.
Həlolə nuniro ekəymon aki,
Bonisə kusəmon pur əbiy ta ki.
Bə dusti-deşmeni qi şat nəkəymon,
Deşdə dasti kiri jimon əkəymon.
Bə hiçki aşiyən su nəvotimon,
Rost bəmon, bə yoli du nəvotimon...
Lələ doşe bəmə merdə tərbiyə,
Jidə hejo dəmə merdə tərbiyə!
Əməni hiççiku ofəyə Xıdo,
Bıbaxş, rəhmət bıkə Lələ de Dodo!
05. 12. 2018. Xanəli Tolış.
|
