Bunun nə talışlardan, nə də onun problemindən deyəsən heç xəbəri yoxdur, ya da camaatı ələ salır. Talışların rahat yaşamasının bu problemə nə aidiyyəti ? Son 25 ildə Lənkəran universiteti və ya onun kolleci neçə nəfər talış dili üzrə pedaqoq-mütəxəssis hazırlayıb? Əlbəttə ki, heç bir nəfər də yox. Amma hər il Azərbaycanda minlərlə əcnəbi dillər üzrə pedaqoji kadrlar hazırlanır. Bəs belə olan halda hansı talış dilinin tədrisindən danışmaq olar? Statistik məlumata görə guya 200-dən yuxarı məktəbdə talış dili tədris olunur.

Azərbaycanda yaşayan qeyri-türk xalqların hüquqlarından danışanda ilk əks arqument ondan ibarət olur ki, Azərbaycanda etnik ayrı-seçkilik yoxdur. 16 ildir Lənkəran adından parlamentdə oturan saxta deputat Rüfət Quliyev də bugün eyni sözləri deyib.
Kimsə Azərbaycanda etnik zəmində ayrı-seçkilik olmasını demir. Allaha şükür, kimsəni məktəbdə ayrı oturtmurlar, universitetə qəbul zamanı bal topladığı halda kənarda saxlamırlar. Həyatda yerliçilik, qohumbazlıq kimi nepotizm halları ilə üzləşə bilərik, amma bu, başqa mövzudur, etnik çalara malik deyil. Bu yaxınlarda bir talışı ABŞ-a səfir kimi önəmli vəzifəyə təyin etdilər. Başqa çoxlu nümunələr də göstərmək olar.