18:47 HİÇ NIBU İ KƏRƏ MINİ SƏDOKƏ | |
| HİÇ NIBU İ KƏRƏ MINİ SƏDOKƏ Bəxtiyar Ruşin 07. 12. 2016 Dardon çımı səpe, mandəm jitono, Dilım tamarzuye yaman botıno, Boçi tı oqətdəş mıni bitono? Iştə dıli kəybon bomı o bıkə, Hiç nıbu i kərə mıni sədokə! Su jeydə sipyə dim de ayki-vayki, Tınım vinde votem, həşi peməyki! Dılədəm xun şedə, kəy dılə toyki; Boy çımı ruşinə tıkəy rə pekə, Hiç nıbu i kərə mıni sədokə! Kəşə əzobonım hiç zındəş çanəy? Hiç nıbu bovəkə, zolım, lamələy! Bovə kardənişbu, boy tı çəmə kəy; Az ğəmon bəvotem, tı qit-qit tokə! Hiç nıbu i kərə mıni sədokə! Ki bətı dılış doy – azbim dıl ədə, Hıç dıləti mandə çımı dılədə?! Boçi haşdəş mıni dardon dılədə? Im koç-koç bə dıli, kinəlim, şokə, Hiç nıbu i kərə mıni sədokə!  Qavər cəfo kəşe – ım çımı ğarze?! Bəmı zulum karde botıno vərze! Nıştəş dılon sədə, vırə ve barze; Boy bəçmı dıli sə ısətən rokə, Hiç nıbu i kərə mıni sədokə! Bətı sard nıqıno – sardonı bəmı, Lınqisə qard nıbu – qardonı bəmı, Xıdoku dard nıbu – dardonı bəmı! Əqəm dardı bıbu, boy bəmı bokə, Hiç nıbu i kərə mıni sədokə! Tı konco nəvedəş, konco dəpişəş? Kom vıli buyku əndə huşiyəş? Qavər omedəbiş, roysə dəqijəş! Bomıno kamişi fik-fani cokə, Hiç nıbu i kərə mıni sədokə! | |
|
| |
| Total comments: 0 | |