Az.R-ku nuə xəbon.
-----------------------------
Çəmə muxbir xəbə dodə ki,Tolış-Mığonə Respublika prezident Əlikram Hummətzodə de “facebook”i vasitə bə tolışon de jıqo qıləy parsi ovardəşe: -Tolışon de ım dızdə hukuməti bə ivrə jie məcburin, ya ne?
Bə ım parsi muxtəlifə cəvobon omən. Çə cəvobonku məlum bıə ki, Tolışon de ım dızdə hukuməti bə ivrə jiye məcbur nin, çı tolışon həxşon heste ki, ıştə devləti bısoxton.
***
Azərbaycani yolə vəzifəninə məmuron - de Rövnəğ Abdullayevi, iyən Kəmaləddin Heydərovi aspardəy Tolışıstoni Lankon, iyən Ostoro ərazionədə tolışə vışon beğıymətinə amburə, uləsə, bəlelə, iyən co doon ancanedən, çə vişon doonku həminə məmuron taxta sexonədə istifodə kardedən, təy bıə zəminədə ısə sitrusə toğə kaştedən. Jıqonə sitrusə boğon bə həminə məmuron şəxsiyə mənafe qornə eğandedən ki, ımən bə Tolışə məholi ekoloqiya mənfiə təsir bəkarde. Prezidenti komandəku etılə məlumatədə votə bedə ki, Paşayevon klan bə həminə boğon xanboze.
Im mevzu çəmə dığğətədəy.
***
Azərbaycani “nur.az” internetə resurs xəbə dodə ki, Azərbaycanədə repressiyon dəvom kardedən. Jıqo ki, dekabri 2-ədə çı Rusiyaku bə Azərbaycan omə dindor, ilahıyyatəvon Seyyid Ağarəşid Talıbov Boku aeroportədə xalqi arədə de “Bandotdel” nomi məhşurə idorə koəkon tərəfo dastqir kardə bıə. Həminə polisə idorə çey dastqir karde səbəbi həxədə hiççi votəşni. Əyən ğeyd bıkəmon ki, Talıbov çı Tolışıstoni Masəlu rayoni Bırədiqo ğəsəbəkue, holiyədə Rusiyada jidə, hejo vəyoən de dini fəaliyyəti səpoçəy.
***
Dekabri iminə rujədə Tolışıstoni Masəlu şəhərədə Biolojiə təbabətə klinika obə. Həminə mərasimədə Azərbaycanədə Biolojiyə təbabətə klinika şəbəkon layihə rəhbər, “Planeta” Kommersiya şirkəti yolə direktor Elxan Yaqubovi ıştə qəpədə votəşe ki, ım 5 mərtəbəynə klinika ki, Masəluədə dutəşone, bı sahədə iqlə Azərbaycanədə ne, həmən Avropada de analoji klinikon rəğabətədə bə dumo mandedəni.
Bə Masəlu Bioloji Klinika çı Elxan Yağubovi zoə Qüdrət Yağubov rəhbərəti bəkarde.
***
Minqəçevirədə qıley merdi ıştə cıvonə jeni sə toşəşe, bı holədə çəy video kəşəşe, peşoən ım video bə “İnstaqram” noəşe. Videodə məlum bedə ki, jeni de co merdi bəştə şuə xəyonət kardəşe, çı xəyonəti səpe oj bıə ruji merdi deştə jeni ım ğəziyyə kardəşe. Huğuğ muhafizə orğanon hələ ki, bı video reaksiya doəşon ni. Həminə cıvonə xıyzoni i qılə əğılşən heste.
***

Boku Polis İdorə məlumat doydə ki, dekabrə manqi 2-ədə Qazax-Boku avtomobilə trasi çı Boku Ğərədağ rayono davardə hissədə “Mercedes” markaynə avtomobili bə “KamAZ” markaynə avtomobili pekkuəşe. "Merseders"i 5 kəs sərnişini həmmə ıştə jimon fot kardəşone.
Boku Polisə İdorə bardə istintağo məlum bıə ki, ımon həmmə i xıyzoni uzvin və Ağcabədiyo, çı huzrə vırəku bə Boku oqardedəbin.
Mardəyonədə qıley 6 sininə hırdəne.